स्रोद गोमोरदोँ

जोँनाय गोनां सोरां अलंबारा
माबा रादाब होदोँ देरहानायनि,
मोनाबिलि खोमसि अखोरांआव ।
बेनि सोरांआ रुजुथावै हार्थखिजोँ,
समायना जोँसारना मिनिस्लुदोँ बेयो
खोमसि आंनि सिलायाव सोरां सारदोँ ।
हाद्रि बिरबायनाय, हाब्रु जाफबनाय
मोनाबिलियावनो नोँ साफिदोँ...
सांग्रेमाया जेरैबायदि माबा नाखिरो
नोँबो नागिरदोँ हे गेदेमा!
आंनि खोमसि सिलायाव दान्दिसे
आंनि लाथा हाब्रुआव दान्दिसे
नोँ सोरांसार आंनि मेगन बेखेवदोँ ।
गेना लामाखौ नोँ फोसाब्बाय हे!
खोमसि आंनि सिलायाव सोरां,
दाखोर-दाला, जेँसि-जेँला
गासैबो नुदोँ आं नोँनि सोरांजोँ;
गोरबोआव गाबखांदोँ आंनि
मेगना आलौदोँ दाखोर दालानि सिलाखौ ।
नोँ थुलुंगा होबाय हे गेदेमा!
आन्दायनाय गोरबोआव सानस्रि होबाय;
हे गेदेमा! आं बुजिबाय,
सिफियाव आसि सोना आरो
अललिया महरै थानो हालिया ।
दान्दिसे सोरांजोँ नोँ दिन्थिबाय
दान्दिसे अन्नायजोँ नोँ दैदेनबाय ।
हे गेदेमा!
अरायबो उनाव आं नोँनि
नोँनि साया साया आं ।
हास्थायदोँमोन आं मिथि मोनै
मोनबायथागोन लामायाव,
नाथाय गेदेमा नोँ-
हे गेदेमा नोँ!
दिन्थिबायल' ससे लामा
जेरैबायदि आं हान्थिनांगौ,
अलसिया देभिलनि मेलेमखौ उन्नो
आरो
गोख्रोँ देहा मावथि आखुखौ ।
हे गेदेमा!
सोरांसि गोथार फुं समाव नोँ
स्रोद गोमोरदोँ नोँ
दान्दिसे आं गोलांनाय समाव ।

by Ronjoy Brahma

Comments (0)

There is no comment submitted by members.