To A Mouse

Wee, sleekit, cowrin, tim'rous beastie,
O, what a panic's in thy breastie!
Thou need na start awa sae hasty,
Wi' bickering brattle!
I wad be laith to rin an' chase thee
Wi' murd'ring pattle!

I'm truly sorry man's dominion,
Has broken nature's social union,
An' justifies that ill opinion,
What makes thee startle
At me, thy poor, earth-born companion,
An' fellow-mortal!

I doubt na, whiles, but thou may thieve;
What then? poor beastie, thou maun live!
A daimen icker in a thrave
'S a sma' request;
I'll get a blessin wi' the lave,
An' never miss't!

Thy wee bit housie, too, in ruin!
It's silly wa's the win's are strewin!
An' naething, now, to big a new ane,
O' foggage green!
An' bleak December's winds ensuin,
Baith snell an' keen!

Thou saw the fields laid bare an' waste,
An' weary winter comin fast,
An' cozie here, beneath the blast,
Thou thought to dwell -
Till crash! the cruel coulter past
Out thro' thy cell.

That wee bit heap o' leaves an' stibble,
Has cost thee mony a weary nibble!
Now thou's turn'd out, for a' thy trouble,
But house or hald,
To thole the winter's sleety dribble,
An' cranreuch cauld!

But Mousie, thou art no thy lane,
In proving foresight may be vain;
The best-laid schemes o' mice an' men
Gang aft agley,
An' lea'e us nought but grief an' pain,
For promis'd joy!

Still thou art blest, compar'd wi' me;
The present only toucheth thee:
But och! I backward cast my e'e,
On prospects dreaer!
An' forward, tho' I canna see,
I guess an' fear!

by Robert Burns

Comments (8)

' The present only toucheth thee'.........wise mouse!
I love this poem, it has given me such inspiration over the years.
The audio rendition of To a Mouse is absolutely horrendous. The reader spells word contractions instead of pronouncing the shortened word. For example, wi is spelled out as N A, instead of pronounced wi as in with. I expected a true Scottish rendition instead of some amateurish attempt. Additionally, the reader knows nothing about reading poetry. You should really remove the audio. It's embarrassing.
As a schoolboy in Scotland the works of Burns featured heavily in our English lessons. This was always one of my favourites and I can still recite it from memory nearly 50 years later.
I remember my mother telling me this and many more of robby burns poems, but this was my favorate, brings back fond memorys
See More